(ਸਮਾਜ ਵੀਕਲੀ)
ਚੰਨ ਸੂਰਜ ਵਰਗਿਆ ਸੱਜਣਾ
——————————–
ਤੈਨੂੰ ਪੋਹ ਮਹੀਨੇ ਦੀ ਸੰਗਰਾਂਦ ਮੁਬਾਰਕ ਹੋਵੇ ।
ਤੇਰੇ ਜੀਵਨ ਦਾ ਕੋਈ ਪਲ ਨਾ ਹਾਨੀਕਾਰਕ ਹੋਵੇ।
ਤੂੰ ਤਾਂ ਸਾਰੀ ਦੁਨੀਆਂ ਨੂੰ ਏਦਾਂ ਹੀ ਰਹੇਂ ਜਗਾਉਂਦਾ ;
ਤੇਰਾ ‘ਕੱਲਾ ‘ਕੱਲਾ ਸ਼ਬਦ ਜਿਵੇਂ ਪ੍ਰਚਾਰਕ ਹੋਵੇ।
ਚੜ੍ਹ ਗਿਆ ਮਹੀਨਾ ਪੋਹ
—————————
ਹੈ ਪੋਹ ਦੇ ਮੀਨ੍ਹੇਂ ਦੀ ਸੰਗਰਾਂਦ ,
ਨਾਲ਼ੇ ਅੱਜ ਪੂਰਨਮਾਸ਼ੀ ਹੈ ।
ਜੋ ਵੀ ਇਸਦੀ ਸਰਦੀ ਝੱਲ ‘ਜੂ ,
ਉਹਨੂੰ ਮਿਲ ਜਾਣੀ ਸ਼ਬਾਸ਼ੀ ਹੈ ।
ਅਪਣੀ ਤੇ ਬੱਚਿਆਂ ਦੀ ਦੇਖਭਾਲ ,
ਹਰ ਕੋਈ ਕਰਦਾ ਰਹਿੰਦਾ ਹੈ ;
ਮਾਪਿਆਂ ਦੀ ਕਰ ਲਊ ਜੋ ਸੇਵਾ ,
ਉਹਦੀ ਕਟ ਜਾਣੀ ਚੁਰਾਸੀ ਹੈ ।
ਅੱਗਾ ਦੌੜ ਤੇ ਪਿੱਛਾ ਚੌੜ
—————————
ਜਿਸ ਨੇ ਇੱਕ ਨਾ ਇੱਕ ਦਿਨ ਆਵਣਾ ਏ ,
ਓਸ ਮੌਤ ਦੇ ਕੋਲ਼ੋਂ ਨਾ ਕਦੇ ਡਰੀਏ ।
ਇੱਕ ਵਾਰੀ ਤਾਂ ਮੌਤ ਵੀ ਰਾਹ ਛੱਡਦੀ ,
ਸੀਸ ਲਾਹ ਕੇ ਤਲ਼ੀ ‘ਤੇ ਜਦੋਂ ਧਰੀਏ ।
ਬੇਵਫ਼ਾ ਦਾ ਦਾਗ਼ ਨਾ ਲੱਗਣ ਦੇਈਏ ,
ਸਿਰੇ ਲਾ ਦੇਈਏ ਜੀਹਦੀ ਬਾਂਹ ਫੜੀਏ ।
ਸੱਚ ਕਿਹਾ ਸਿਆਣਿਆਂ ਬੰਦਿਆਂ ਨੇ ,
ਅੱਗਾ ਦੌੜ ਤੇ ਪਿੱਛਾ ਨਾ ਚੌੜ ਕਰੀਏ ।
ਮੂਲ ਚੰਦ ਸ਼ਰਮਾ ਪ੍ਰਧਾਨ ,
ਪੰਜਾਬੀ ਸਾਹਿਤ ਸਭਾ ਧੂਰੀ ਜਿਲ੍ਹਾ ਸੰਗਰੂਰ ।
9914836037
( ਕਿਤਾਬ ” ਪੱਥਰ ‘ਤੇ ਲਕੀਰਾਂ ” ਵਿੱਚੋਂ )
