(ਸਮਾਜ ਵੀਕਲੀ)
ਭੋਲ਼ੇ ਬਾਬੇ ਦੀ ਸਤਸੰਗ ਵਿੱਚ
——————————
ਤਬਕਾ ਭੋਲ਼ੇ ਭਾਲ਼ੇ ਗ਼ਰੀਬਾਂ ਦਾ ,
ਬਹੁਤੀਆਂ ਔਰਤਾਂ ਸਨ ਜਾਂ ਬੱਚੇ ਸਨ ।
ਭੰਨੇਂ ਹੋਣਗੇ ਆਰਥਿਕ ਲੋੜਾਂ ਦੇ ,
ਸੋਚ ਸਮਝ ਦੇ ਪੱਖ ਤੋਂ ਕੱਚੇ ਸਨ ।
ਚਲਦੇ ਸੱਤ ਕੇਸ ਹਨ ਬਾਬੇ ਉੱਤੇ ,
ਜਿਹਨਾਂ ਵਿੱਚੋਂ ਇੱਕ ਹੈ ਰੇਪ ਦਾ ਵੀ ;
ਸੈਂਕੜੇ ਲੋਕ ਨੇ ਜਾਨ ਗੁਆ ਬੈਠੇ ,
ਫੋਕੀ ਸ਼ਰਧਾ ਦੇ ਵਿੱਚ ਬੱਝੇ ਸਨ ।
ਅਸਲੀ ਮੁੱਦੇ ਫੇਰ ਭੁਲਾ ‘ਤੇ
—————————-
ਜੋ ਵੀਹ ਬਾਈ ਦੇ ਵਿੱਚ ਝਾੜੂ ਕਰਕੇ ਜਿੱਤੇ ਸੀ ,
ਓਹੀ ਘਰ ਦੇ ਭੇਤੀ ਛੱਜ ‘ ਚ ਪਾ ਕੇ ਛੰਡਦੇ ਨੇ ।
ਜਿਹੜੇ ਆਪ ਨੂੰ ਕੱਟੜ ਈਮਾਨਦਾਰ ਅਖਵਾਉਂਦੇ ਸੀ ,
ਲੋਕਾਂ ਨੂੰ ਜਾਤਾਂ ਤੇ ਫਿਰਕਿਆਂ ਦੇ ਵਿੱਚ ਵੰਡਦੇ ਨੇ ।
ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਦਾ ਕੋਈ ਉੱਤਰ ਦੇਣ ਦੀ ਥਾਂ ,
ਮੁੜ ਕੇ ਹਾਸੋ ਹੀਣੇ ਲਾਉਂਦੇ ਦੋਸ਼ ਵਿਰੋਧੀਆਂ ‘ ਤੇ ;
ਜਿਨ੍ਹਾਂ ਦਾ ਅਪਦਾ ਖ਼ੁਦ ਦਾ ਕੈਂਡੀਡੇਟ ਦਲ ਬਦਲੂ ਹੈ ,
ਉਹ ਵੀ ਦੂਜਿਆਂ ਨੂੰ ਦਲਬਦਲੂ ਕਹਿ ਕੇ ਭੰਡਦੇ ਨੇ ।
ਸਾਈ ਦੇ ਕੇ ਲਿਖਾਈ ਕਵਿਤਾ
——————————
ਤੂੰ ਸੋਹਣੀ ਤੇਰੀ ਸੀਰਤ ਸੋਹਣੀ ,
ਤੈਨੂੰ ਇਸ਼ਕ ਦੇ ਰੰਗ ਵਿਖਾਵਾਂਗੇ ।
ਤੇਰੇ ਰੇਸ਼ਮ ਵਰਗਿਆਂ ਅੰਗਾਂ ਨੂੰ ,
ਅਪਣੇ ਗੀਤਾਂ ਵਿੱਚ ਸਲਾਹਵਾਂਗੇ ।
ਕਦੇ ਕਵਿਤਾ ਗ਼ਜ਼ਲ ਕਹਾਣੀ ਵਿੱਚ ,
ਤੇਰੇ ਤਿੱਖੇ ਨਕਸ਼ ਉਲੀਕਾਂਗੇ ;
ਗੁੱਡੀ ਕਾਗ਼ਜ਼ ਵਰਗੀਏ ਕੁੜੀਏ ਨੀ ,
ਤੈਨੂੰ ਅੰਬਰ ਵਿੱਚ ਉਡਾਵਾਂਗੇ ।
ਸਾਈ ਵਾਲ਼ੀ ਕਵਿਤਾ ਦਾ ਜਵਾਬ ਆਇਆ
——————————
ਤੂੰ ਵੀ ਸੋਹਣਾ ਮਨ ਨੂੰ ਮੋਹਣਾ ,
ਤੈਨੂੰ ਹੁਸਨ ਦੇ ਜੌਹਰ ਵਿਖਾਊਂਗੀ ।
ਤੇਰੇ ਹਵਾ ਪਿਆਜ਼ੀ ਗੀਤਾਂ ਨੂੰ ,
ਹੋਸਟਲ ਵਿੱਚ ਬਹਿ ਕੇ ਗਾਊਂਗੀ ।
ਹਰ ਕਵਿਤਾ ਗ਼ਜ਼ਲ ਕਹਾਣੀ ‘ਚੋਂ ,
ਮੈਨੂੰ ਸਦਾ ਤੇਰੀ ਤਸਵੀਰ ਦਿਸੂ ;
ਤੇਰੇ ਪਿੰਡ ਰੰਚਣਾਂ ਰੁਲ਼ਦੂ ਸਿੰਆਂ ,
ਮੈਂ ਕਦੇ ਬਣ ਕੇ ਪ੍ਰਾਹੁਣੀ ਆਊਂਗੀ।
ਮੂਲ ਚੰਦ ਸ਼ਰਮਾ,
9914836037
