(ਸਮਾਜ ਵੀਕਲੀ)
ਝੋਟਾ, ਬੈਲ ਜਾਂ ਖੋਤਾ ਘੋੜਾ
ਜਿਹੜੇ ਵਾਹੁੰਦੇ, ਸੁਣ ਲਓ ਥੋੜ੍ਹਾ
ਸਮਝੋ ਨਾ, ਬੇਜਾਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ
ਆਪਣਾ ਹੀ ਕਿਉਂ ਫਾਇਦਾ ਚਾਹੁੰਦੇ
ਬੇਜ਼ੁਬਾਨਾਂ ‘ ਤੇ ਜ਼ੁਲਮ ਹੋ ਢਾਹੁੰਦੇ
ਕੁੱਝ ਤਾਂ ਰਹਿਮ, ਕਰੋ ਇਨਸਾਨੋ
ਕਿਉਂ ਤੜਪਾ ਕੇ ਮਾਰਦੇਂ ਜਾਨੋਂ
ਉਹ ਤਾਂ ਬੇ – ਜ਼ੁਬਾਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ
ਬੋਝਿਆਂ ਥੱਲੇ ਹਰਦੇ ਵੇਖੇ
ਧੁੱਪਾਂ ਦੇ ਵਿੱਚ ਸੜਦੇ ਵੇਖੇ
ਕੁੱਟਾਂ ਮਾਰਾਂ ਜਰਦੇ ਵੇਖੇ
ਤੜਪ- ਤੜਪ ਕੇ ਮਰਦੇ ਵੇਖੇ
ਹੋ ਕੇ ਲਹੂ ਲੁਹਾਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ
ਜ਼ਖ਼ਮਾਂ ਨਾਲ ਸਰੀਰ ਜੜੇ ਨੇ
ਫਿਰ ਵੀ ਚੁੱਕ ਕੇ ਭਾਰ ਖੜ੍ਹੇ ਨੇ
ਅੱਖੀਆਂ ਵਿੱਚੋਂ ਅੱਥਰੂ ਚੋਏ
ਦਿਲ ਮੇਰਾ ਵੀ ਵੇਖ ਕੇ ਰੋਏ
ਵੇਖ ਹੋਇਆਂ ਹੈਰਾਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ
ਖੌਰੇ ਕਿੰਨੀ ਦਰਦ ਹੋਵੇਗੀ
ਪਤਾ ਨਹੀਂ ਕੀ ਮਰਜ਼ ਹੋਵੇਗੀ
ਹੋ ਸਕਦਾ … ਬੁਖ਼ਾਰ ਹੋਵੇਗਾ
ਕੀ ਉਸਦਾ ਉਪਚਾਰ ਹੋਵੇਗਾ
ਕਿੱਥੇ ਥੋਡਾ ਈਮਾਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ
ਹੋਵਣਗੀਆਂ ਦੁਖਦੀਆਂ ਲੱਤਾਂ
ਕਿੱਥੇ ਗਈਆਂ ਥੋਡੀਆਂ ਮੱਤਾਂ
ਕਦੀ ਤਾਂ ਉਸਦਾ ਦਰਦ ਪਛਾਣੋ
ਕਦੀ ਤਾਂ ਉਸਦੇ ਹਾਲ ਨੂੰ ਜਾਣੋ
ਕਿਉਂ ਬਣਦੇਂ ਹੈਵਾਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ
ਹੋ ਸਕਦਾ ਉਹ, ਥੱਕੇ ਹੋਵਣ
ਬੋਝਾ ਢੋਅ-ਢੋਅ, ਅੱਕੇ ਹੋਵਣ
ਉਹ ਥੋਡਾ ਪਰਿਵਾਰ ਚਲਾਉਂਦੇ
ਫਿਰ ਵੀ ਨਾ ਕੋਈ ਹੱਕ ਜਤਾਉਂਦੇ
ਭੁੱਲੋ ਨਾ ਅਹਿਸਾਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ
ਕਦੀ ਉਨ੍ਹਾਂ ਨੂੰ ਪਿਆਰ ਜਤਾਵੋ
ਕਦੀ ਉਨ੍ਹਾਂ ਨੂੰ ਗਲ਼ ਨਾਲ ਲਾਵੋ
ਜਖ਼ਮਾਂ ਤੇ ਕਦੇ ਮਰ੍ਹਮ ਲਗਾਓ
ਗਰਮੀਂ ਸਰਦੀ ਤੋਂ ਵੀ ਬਚਾਓ
ਆਪਣਾ ਫਰਜ਼ ਪਛਾਣ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ
ਉਹ ਵੀ ਕਰਨਾ ਆਰਾਮ ਨੇ ਚਾਹੁੰਦੇ
ਚੰਗਾ ਪੀਣਾ- ਖਾਣਾ ਚਾਹੁੰਦੇ
ਬਿਨ ਖਾਧੇ ਉਹ, ਕਿਵੇਂ ਚੱਲਣਗੇ
ਭੱਜਦਿਆਂ ਦੇ ਨਾਲ ਕਿਵੇਂ ਰਲ਼ਣਗੇ
ਕੀ ਕੀ ਕਰਾਂ ਬਿਆਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ
ਸਿਰ ਥੋਡੇ ‘ਤੇ ਭਾਰ ਜੇ ਹੋਵੇ
ਉਪਰੋਂ ਪੈਂਦੀ ਮਾਰ ਜੇ ਹੋਵੇ
ਫੇਰ ਕਿਵੇਂ ਮਹਿਸੂਸ ਕਰੋਗੇ
ਕਦ ਤੱਕ ਐਸਾ ਜ਼ੁਲਮ ਜਰੋਗੇ
ਇਸ ਵੱਲ ਦਿਓ ਧਿਆਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ…
“ਖੁਸ਼ੀ ਮੁਹੰਮਦਾ” ਜੇ ਵੱਸ ਚੱਲੇ
ਬੇਜ਼ੁਬਾਨਾਂ ਦੀ ਕਰਦਿਆਂ ਬੱਲੇ
ਨਾ ਫਿਰ ਕੋਈ ਜ਼ੁਲਮ ਕਰੇਗਾ
ਨਾ ਹੀ ਕੋਈ , ਤੜਪ ਮਰੇਗਾ
ਨਾ ਹੋਊ ਪਰੇਸ਼ਾਨ ਓ ਲੋਕੋ
ਉਨ੍ਹਾਂ ਵਿੱਚ ਵੀ ਜਾਨ ਓ ਲੋਕੋ…
ਖੁਸ਼ੀ ਮੁਹੰਮਦ ‘ਚੱਠਾ’
(M): 9779025356
