ਘਰ ਦੀ ਇੱਜ਼ਤ / ਮਿੰਨੀ ਕਹਾਣੀ

(ਸਮਾਜ ਵੀਕਲੀ)-ਸੁਖਵਿੰਦਰ ਨੂੰ ਸਹੁਰੇ ਘਰ ਆਈ ਨੂੰ ਇੱਕ ਮਹੀਨਾ ਹੋ ਗਿਆ ਸੀ। ਉਸ ਦੀ ਨਨਾਣ ਮਨਜੀਤ ਦੀ ਉਮਰ ਬਾਈ ਸਾਲ ਹੋ ਗਈ ਸੀ। ਉਸ ਦੇ ਰਿਸ਼ਤੇ ਦੀ ਕਈ ਪਾਸੇ ਗੱਲ ਚੱਲੀ, ਪਰ ਹਰ ਪਾਸੇ ਦਾਜ ਦੀ ਮੰਗ ਕਰਕੇ ਕੋਈ ਰਿਸ਼ਤਾ ਸਿਰੇ ਨਹੀਂ ਸੀ ਚੜ੍ਹ ਰਿਹਾ। ਉਸ ਦੇ ਸਹੁਰੇ ਦਾਜ ਦੇਣ ਦੇ ਸਮਰੱਥ ਨਹੀਂ ਸਨ। ਅੱਜ ਫਿਰ ਮਨਜੀਤ ਨੂੰ ਰਿਸ਼ਤਾ ਆਇਆ ਸੀ। ਇਸ ਵਿੱਚ ਵੀ ਦਾਜ ਦੇਣ ਦੀ ਮੰਗ ਸੀ। ਉਸ ਦੀ ਸੱਸ ਨੇ ਉਸ ਦੇ ਅੱਗੇ ਦਾਜ ਸਬੰਧੀ ਗੱਲ ਬਾਤ ਕੀਤੀ। ਉਸ ਨੇ ਆਖਿਆ,” ਮੰਮੀ ਜੀ, ਹੁਣ ਇਹ ਮੇਰਾ ਘਰ ਆ। ਇਸ ਘਰ ਦੀ ਇੱਜ਼ਤ, ਮੇਰੀ ਇੱਜ਼ਤ ਆ। ਮੇਰੇ ਘਰਦਿਆਂ ਨੇ ਜਿਹੜਾ ਦਾਜ ਮੈਨੂੰ ਦਿੱਤਾ ਆ, ਉਸ ਚੋਂ ਜਿਹੜੀਆਂ ਮਰਜ਼ੀ ਚੀਜ਼ਾਂ ਤੁਸੀਂ ਆਪਣੀ ਮਨਜੀਤ ਨੂੰ ਦੇ ਦਿਉ। ਮੈਨੂੰ ਕੋਈ ਇਤਰਾਜ਼ ਨਹੀਂ। ਮੈਂ ਤਾਂ ਹਾਲੇ ਉਨ੍ਹਾਂ ਚੋਂ ਕੋਈ ਵੀ ਚੀਜ਼ ਨਹੀਂ ਵਰਤੀ। ਬਾਅਦ ‘ਚ ਅਸੀਂ ਤੀਵੀਂ, ਆਦਮੀ ਮਿਹਨਤ ਕਰਕੇ  ਜਿਸ ਚੀਜ਼ ਦੀ ਲੋੜ ਹੋਈ, ਬਣਾਂ ਲਵਾਂਗੇ।”