ਨਵੀਂ ਦਿੱਲੀ— ਭਾਰਤੀ ਰਿਜ਼ਰਵ ਬੈਂਕ (ਆਰ.ਬੀ.ਆਈ.) ਦੇ ਗਵਰਨਰ ਸੰਜੇ ਮਲਹੋਤਰਾ ਨੇ ਸ਼ੁੱਕਰਵਾਰ ਨੂੰ ਰੈਪੋ ਦਰ ‘ਚ 25 ਆਧਾਰ ਅੰਕ ਜਾਂ 0.25 ਫੀਸਦੀ ਦੀ ਕਟੌਤੀ ਦਾ ਐਲਾਨ ਕੀਤਾ। ਰੇਪੋ ਰੇਟ ‘ਚ ਕਟੌਤੀ ਦਾ ਸਿੱਧਾ ਅਸਰ ਲੋਨ ਦੀਆਂ ਵਿਆਜ ਦਰਾਂ ‘ਤੇ ਪੈਂਦਾ ਹੈ ਅਤੇ ਹੋਮ ਲੋਨ ਤੋਂ ਲੈ ਕੇ ਕਾਰ ਲੋਨ ਤੱਕ ਉਹ ਸਸਤੇ ਹੋ ਜਾਂਦੇ ਹਨ।
ਪਿਛਲੇ ਪੰਜ ਸਾਲਾਂ ਵਿੱਚ ਪਹਿਲੀ ਵਾਰ ਆਰਬੀਆਈ ਨੇ ਰੇਪੋ ਰੇਟ ਵਿੱਚ ਕਟੌਤੀ ਕੀਤੀ ਹੈ। ਇਸ ਤੋਂ ਪਹਿਲਾਂ ਮਈ 2020 ‘ਚ ਰੈਪੋ ਰੇਟ ਨੂੰ 4 ਫੀਸਦੀ ਤੱਕ ਘਟਾ ਦਿੱਤਾ ਗਿਆ ਸੀ। ਰੈਪੋ ਰੇਟ ਦੀ ਸਮੀਖਿਆ ਕਰਨ ਲਈ ਆਰਬੀਆਈ ਐਮਪੀਸੀ ਦੀ ਮੀਟਿੰਗ 5 ਫਰਵਰੀ ਤੋਂ 7 ਫਰਵਰੀ ਤੱਕ ਹੋਈ ਸੀ, ਜਿਸ ਦੇ ਫੈਸਲੇ ਦਾ ਐਲਾਨ ਆਰਬੀਆਈ ਗਵਰਨਰ ਸੰਜੇ ਮਲਹੋਤਰਾ ਨੇ ਕੀਤਾ।
ਮਲਹੋਤਰਾ ਨੇ ਕਿਹਾ ਕਿ ਐਮਪੀਸੀ ਦੇ ਫੈਸਲੇ ਦੇਸ਼ ਦੇ ਸਾਰੇ ਨਾਗਰਿਕਾਂ ਨੂੰ ਪ੍ਰਭਾਵਤ ਕਰਨਗੇ। ਇਹ ਵਪਾਰਕ, ਅਰਥ ਸ਼ਾਸਤਰੀ ਅਤੇ ਸਾਰੀਆਂ ਪਾਰਟੀਆਂ ਲਈ ਮਹੱਤਵਪੂਰਨ ਹੈ। ਇਹ ਵੀ ਦੱਸਿਆ ਕਿ ਮਹਿੰਗਾਈ ਟੀਚੇ ਦੇ ਮੁਤਾਬਕ ਬਣੀ ਹੋਈ ਹੈ ਅਤੇ ਇਹ ਹੇਠਾਂ ਆ ਸਕਦੀ ਹੈ। ਰੇਪੋ ‘ਚ 0.25 ਫੀਸਦੀ ਦੀ ਕਟੌਤੀ ਤੋਂ ਬਾਅਦ ਇਹ 6.25 ਫੀਸਦੀ ‘ਤੇ ਆ ਗਿਆ ਹੈ, ਜੋ ਪਹਿਲਾਂ 6.50 ਫੀਸਦੀ ਸੀ।
ਆਰਬੀਆਈ ਵੱਲੋਂ ਦੱਸਿਆ ਗਿਆ ਕਿ ਵਿੱਤੀ ਸਾਲ 25 ਵਿੱਚ ਪ੍ਰਚੂਨ ਮਹਿੰਗਾਈ ਦਰ 4.8 ਫੀਸਦੀ ਰਹਿਣ ਦਾ ਅਨੁਮਾਨ ਹੈ, ਜੋ ਚਾਲੂ ਵਿੱਤੀ ਸਾਲ ਦੀ ਤੀਜੀ ਤਿਮਾਹੀ ਵਿੱਚ 4.4 ਫੀਸਦੀ ਹੋ ਸਕਦਾ ਹੈ। ਆਮ ਮਾਨਸੂਨ ਦੇ ਕਾਰਨ, ਪ੍ਰਚੂਨ ਮਹਿੰਗਾਈ ਵਿੱਤੀ ਸਾਲ 26 ਵਿੱਚ 4.2 ਪ੍ਰਤੀਸ਼ਤ ‘ਤੇ ਰਹਿ ਸਕਦੀ ਹੈ। ਅਗਲੇ ਵਿੱਤੀ ਸਾਲ ਦੀ ਪਹਿਲੀ ਤਿਮਾਹੀ ‘ਚ ਮਹਿੰਗਾਈ ਦਰ 4.5 ਫੀਸਦੀ, ਦੂਜੀ ਤਿਮਾਹੀ ‘ਚ 4 ਫੀਸਦੀ, ਤੀਜੀ ਤਿਮਾਹੀ ‘ਚ 3.8 ਫੀਸਦੀ ਅਤੇ ਚੌਥੀ ਤਿਮਾਹੀ ‘ਚ 4.2 ਫੀਸਦੀ ਰਹਿ ਸਕਦੀ ਹੈ।
ਆਰਬੀਆਈ ਗਵਰਨਰ ਨੇ ਕਿਹਾ ਕਿ ਵਿੱਤੀ ਸਾਲ 25 ਵਿੱਚ ਜੀਡੀਪੀ ਵਿਕਾਸ ਦਰ 6.4 ਫੀਸਦੀ ਰਹਿ ਸਕਦੀ ਹੈ। ਇਸ ਦੇ ਨਾਲ ਹੀ ਵਿੱਤੀ ਸਾਲ 26 ‘ਚ ਜੀਡੀਪੀ ਵਿਕਾਸ ਦਰ 6.7 ਫੀਸਦੀ ਹੋ ਸਕਦੀ ਹੈ। ਜੀਡੀਪੀ ਵਿਕਾਸ ਦਰ ਅਗਲੇ ਵਿੱਤੀ ਸਾਲ ਦੀ ਪਹਿਲੀ ਤਿਮਾਹੀ ‘ਚ 6.7 ਫੀਸਦੀ, ਦੂਜੀ ਤਿਮਾਹੀ ‘ਚ 7 ਫੀਸਦੀ, ਤੀਜੀ ਤਿਮਾਹੀ ‘ਚ 6.5 ਫੀਸਦੀ ਅਤੇ ਚੌਥੀ ਤਿਮਾਹੀ ‘ਚ 6.5 ਫੀਸਦੀ ਰਹਿ ਸਕਦੀ ਹੈ।
ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly
