(ਸਮਾਜ ਵੀਕਲੀ)
ਧਰਮ, ਨਸਲ ਤੇ ਜਾਤ ਦੀ, ਜਿਸਦੇ ਅੰਦਰ ਸੂਲ |
ਭੁੱਲ ਕੇ ਐਸੇ ਸ਼ਖ਼ਸ ਨੂੰ, ਮੂੰਹ ਨਾ ਲਾਵੋ ਮੂਲ |
ਦਿੰਦਾ ਇਹੋ ਨਸੀਅਤ ਹੈ, ਸਾਡਾ ਸਭਿਆਚਾਰ,
ਨੈਤਿਕ ਜੀਵਨ ਜਾਚ ਤੋਂ, ਬਾਕੀ ਹੋਰ ਫਜੂਲ |
ਮੂੰਹ ‘ਤੇ ਆਖੀ ਗੱਲ ਦਾ, ਵੱਖਰਾ ਬਹੁਤ ਸਵਾਦ,
ਕਾਹਦਾ ਆਦਮ ਜਾਤ ਉਹ, ਜਿਸਦੇ ਨਹੀਂ ਅਸੂਲ |
ਲੋਕਾਂ ਨੇ ਹੈ ਚੁੱਕ ਲਏ, ਰੱਬ ਦੇ ਨਾਂ ਹਥਿਆਰ,
ਇੱਕ ਦੇ ਹੱਥ ਤਲਵਾਰ ਹੈ, ਦੂਜੇ ਦੇ ਤ੍ਰਿਸ਼ੂਲ |
ਹਰ ਥਾਂ ‘ਤੇ ਧਨਵਾਨ ਦੀ, ਹੁੰਦੀ ਪੁੱਛ ਪਰਤੀਤ,
ਨੇਕ ਸਲਾਹ ਗਰੀਬ ਦੀ, ਕਰਦਾ ਕੌਣ ਕਬੂਲ ?
ਕਰਜੇ ਵਾਲੇ ਦੈਂਤ ਨੇ, ਚੂਸ ਲਈ ਹੈ ਰੱਤ,
ਤਦੇ ਕਿਸਾਨੀ ਤਖ਼ਤ ਦੀ, ਢਿੱਲੀ ਹੋਈ ਚੂਲ |
ਇਕ ਦਿਨ ਲਿਖਣੇ ਸਿਖ ਲਊ, ਵਾਹਵਾ ਸੋਹਣੇ ਸ਼ਿਅਰ,
‘ ਬੋਪਾਰਾਏ ‘ ਹੋ ਗਿਆ, ਦਾਖ਼ਲ ਗ਼ਜ਼ਲ ਸਕੂਲ |
ਭੁਪਿੰਦਰ ਸਿੰਘ ਬੋਪਾਰਾਏ
