ਗਜ਼ਲ

(ਸਮਾਜ ਵੀਕਲੀ)

ਭਾਵੇਂ ਪਾਕੇ ਮਹਿਲ ਚੁਬਾਰੇ ਬੈਠੇ ਹਾਂ ,
ਕਰਨ ਲਈ ਉਸਦੇ ਦੀਦਾਰੇ ਬੈਠੇ ਹਾਂ ।

ਕੌਣ ਦਿਲਾਸੇ ਦੇਵੇ ਦਰਦਾ ਮਾਰੇ ਨੂੰ ,
ਆਸਾਂ ਰੱਖੀ ਯਾਰ ਸਹਾਰੇ ਬੈਠੇ ਹਾਂ ।

ਚਿਹਰੇ ਉਪਰੋ ਸਰਕੇਗਾ ਨਾਕਾਬ ਕਦੀ,
ਤਾਂ ਦਿਲਬਰ ਦੇ ਮੱਲ ਦੁਆਰੇ ਬੈਠੇ ਹਾਂ।

ਗੈਰਾਂ ਉੱਪਰ ਸ਼ਿਕਵਾ ਕਰਕੇ ਕੀ ਲੈਣਾ,
ਆਪਣਿਆ ਦੇ ਹੱਥੋਂ ਹਾਰੇ ਬੈਠੇ ਹਾਂ ।

ਸੁਪਨੇ ਨੈਣਾਂ ਅੰਦਰ ਤੈਨੂੰ ਪਾਵਣ ਦੇ ,
ਤਾਂ ਹੀ ਹਾਲੇ ਤੱਕ ਕੁਆਰੇ ਬੈਠੇ ਹਾਂ ।

ਸੀਨਾ ਛਲਣੀ ਤੇਰੀ ਯਾਦ ਕਰੇਂਦੀ ਵੇ ,
ਆਜਾ ਹੁਣ ਤਾਂ ਮਰਨ ਕਿਨਾਰੇ ਬੈਠੇ ਹਾਂ।

ਰੱਖਾਂ ਕਰਵਾ ਚੌਥ ਮਨਾਵਾ ਪੀਰਾਂ ਨੂੰ ,
ਹੋ ਜਾਵਣ ਜੇ ਵਾਰੇ ਨਿਆਰੇ ਬੈਠੇ ਹਾਂ।

ਆ ਜਾ ਯਾਰਾ ਰੀਤ ਨਿਭਾਵੀਂ ਇਸ਼ਕੇ ਦੀ ,
ਹੁਸਨਾਂ ਦੇ ਮਿਲ ਜਾਣ ਨਜ਼ਾਰੇ ਬੈਠੇ ਹਾਂ ।

ਆਵੇ ਜਾਂ ਨਾ ਆਵੇ ਮਰਜ਼ੀ ਤੇਰੀ ਹੈ ,
ਬਣਕੇ ਕੂਕਰ ਦਰ ਤੇ ਪਿਆਰੇ ਬੈਠੇ ਹਾਂ।

” ਸੁੱਖ ” ਮਿਲੇ ਜੇ ਮਾਹੀ ਸਾਡਾ ਹੱਜ ਹੋਵੇ ,
ਰਾਹੀਂ ਉਸਦੇ ਫੁੱਲ ਖਿਲਾਰੇ ਬੈਠੇ ਹਾਂ।

ਸੁਖਚੈਨ ਸਿੰਘ ਚੰਦ ਨਵਾਂ
9914973876

‘ਸਮਾਜਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly