ਲੁਧਿਆਣਾ (ਸਮਾਜ ਵੀਕਲੀ) (ਕਰਨੈਲ ਸਿੰਘ ਐੱਮ.ਏ.) ਸਥਾਨਕ ਸਲੇਮ ਟਾਬਰੀ ਵਿਖੇ ਸਥਿਤ ਡਾ: ਡੀ.ਐਨ. ਕੋਟਨਿਸ ਏਕਿਊਪੰਕਚਰ ਹਸਪਤਾਲ (ਸੂਈਆਂ ਵਾਲਾ ਹਸਪਤਾਲ) ਵਿੱਚ ਡੈਂਟਲ ਵਿਭਾਗ ਦੀ ਵੀ ਸ਼ੁਰੂਆਤ ਹੋ ਗਈ ਹੈ। ਸ਼ਨੀਵਾਰ ਨੂੰ ਇਸਦਾ ਉਦਘਾਟਨ ਦੰਦਾਂ ਤੇ ਆਮ ਬਿਮਾਰੀਆਂ ਦੀ ਜਾਂਚ ਕੈਂਪ ਦੇ ਨਾਲ ਵੀਰ ਚੱਕਰ ਵਿਜੇਤਾ ਰਿਟਾਇਰਡ ਐਚ.ਐਸ. ਕਾਹਲੋਂ ਅਤੇ ਸਰਬੱਤ ਦਾ ਭਲਾ ਟਰੱਸਟ ਲੁਧਿਆਣਾ ਦੇ ਪ੍ਰਧਾਨ ਸ੍ਰ :ਜਸਵੰਤ ਸਿੰਘ ਛਾਪਾ ਵੱਲੋਂ ਕੀਤਾ ਗਿਆ। ਇਹ ਕੈਂਪ ਹਿੰਦ-ਚੀਨ ਦੋਸਤੀ ਦੇ ਪ੍ਰਤੀਕ ਤੇ ਮਨੁੱਖਤਾ ਦੇ ਪੁੰਜ ਡਾ: ਦ੍ਵਾਰਕਾ ਨਾਥ ਕੋਟਨਿਸ ਦੇ ਜਨਮ-ਦਿਨ ਨੂੰ ਸਮਰਪਿਤ ਕਰਕੇ ਲਗਾਇਆ ਗਿਆ। ਇਸ ਮੌਕੇ ‘ਤੇ ਵਿਸ਼ੇਸ਼ ਤੌਰ ‘ਤੇ ਪਹੁੰਚੇ ਦੰਦਾਂ ਦੀਆਂ ਬਿਮਾਰੀਆਂ ਦੇ ਮਾਹਿਰ ਡਾ: ਸੰਦੀਪ ਚੋਪੜਾ ਨਾਲ ਡਾ: ਸੁਨੀਲ ਸ਼ਰਮਾ ਨੇ ਕੈਂਪ ‘ਚ ਆਏ ਮਰੀਜ਼ਾਂ ਦੇ ਦੰਦਾਂ ਦੀ ਜਾਂਚ ਕੀਤੀ, ਜਦਕਿ ਆਮ ਬਿਮਾਰੀਆਂ ਦੀ ਜਾਂਚ ਡਾ: ਸ਼ਿਆਮ ਸੁੰਦਰ ਸਿੰਗਲਾ ਤੇ ਡਾ: ਕੁਨਾਲ ਕੌਸ਼ਲ ਵੱਲੋਂ ਕੀਤੀ ਗਈ। ਇਸ ਕੈਂਪ ਵਿੱਚ 176 ਮਰੀਜ਼ਾਂ ਦਾ ਇਲਾਜ ਕੀਤਾ ਗਿਆ। ਇਸ ਮੌਕੇ ‘ਤੇ ਡਾ: ਢੀਂਗਰਾ ਨੇ ਕਿਹਾ ਕਿ ਇੰਡੀਅਨ ਨੈਸ਼ਨਲ ਕਾਂਗਰਸ ਵੱਲੋਂ 1938 ਵਿੱਚ ਪੰਜ ਡਾਕਟਰਾਂ ਦਾ ਇੱਕ ਮੈਡੀਕਲ ਮਿਸ਼ਨ ਚੀਨ ਭੇਜਿਆ ਗਿਆ ਸੀ ਤਾਂ ਜੋ ਉੱਥੇ ਦੇ ਲੋਕਾਂ ਦੀ ਸਿਹਤ ਸਹਾਇਤਾ ਕੀਤੀ ਜਾ ਸਕੇ। ਇਸ ਮਿਸ਼ਨ ਵਿੱਚ ਡਾ: ਦ੍ਵਾਰਕਾ ਨਾਥ ਕੋਟਨਿਸ ਵੀ ਸ਼ਾਮਲ ਸਨ, ਜਿਨ੍ਹਾਂ ਨੇ ਆਪਣੀ ਜਾਨ ਦੀ ਪਰਵਾਹ ਨਾ ਕਰਦੇ ਹੋਏ ਪੂਰੀ ਤਨਦੇਹੀ ਨਾਲ ਚੀਨ ਵਿੱਚ ਫੈਲੀ ਬਿਮਾਰੀ ਨਾਲ ਪੀੜਤ 
ਲੋਕਾਂ ਦੀ ਸੇਵਾ ਕੀਤੀ ਅਤੇ ਆਪਣੀ ਜਾਨ ਤੱਕ ਕੁਰਬਾਨ ਕਰ ਦਿੱਤੀ। ਇਹ ਮਨੁੱਖਤਾ ਦੀ ਸੇਵਾ ਦੀ ਇੱਕ ਵਿਲੱਖਣ ਮਿਸਾਲ ਹੈ। ਹਸਪਤਾਲ ਦੇ ਮਹਾਸਚਿਵ ਇਕਬਾਲ ਸਿੰਘ ਗਿੱਲ (ਆਈ.ਪੀ.ਐਸ. ਰਿਟਾਇਰਡ ਆਈ.ਜੀ.) ਅਤੇ ਜਸਵੰਤ ਸਿੰਘ ਛਾਪਾ ਨੇ ਦੱਸਿਆ ਕਿ ਡਾ: ਕੋਟਨਿਸ ਅਤੇ ਉਨ੍ਹਾਂ ਨਾਲ ਗਏ ਡਾ: ਬਾਸੂ ਦੇ ਮਨੁੱਖਤਾ ਦੇ ਮਿਸ਼ਨ ਨੂੰ ਅੱਗੇ ਵਧਾਉਂਦਿਆਂ ਦੇਸ਼ ਭਰ ਵਿੱਚ ਚਾਰ ਥਾਵਾਂ — ਸ੍ਰੀਨਗਰ, ਭੋਪਾਲ, ਚੇਨਈ ਅਤੇ ਪੰਜਾਬ ਦੇ ਲੁਧਿਆਣਾ — ਵਿੱਚ ਇਸ ਤਰ੍ਹਾਂ ਦੇ ਕੈਂਪ ਲਗਾਏ ਗਏ ਹਨ। ਇੱਥੇ ਮਰੀਜ਼ਾਂ ਦੀਆਂ ਵੱਖ-ਵੱਖ ਬਿਮਾਰੀਆਂ ਦੀ ਜਾਂਚ ਏਕਿਊਪੰਕਚਰ, ਦਵਾਈ ਤੇ ਡੈਂਟਲ ਚਿਕਿਤਸਾ ਪ੍ਰਣਾਲੀ ਰਾਹੀਂ ਕੀਤੀ ਗਈ ਅਤੇ ਉਨ੍ਹਾਂ ਨੂੰ ਮੁਫ਼ਤ ਦਵਾਈ ਵੀ ਦਿੱਤੀ ਗਈ। ਇਸ ਮੌਕੇ ‘ਤੇ ਅਸ਼ਵਨੀ ਵਰਮਾ, ਦਿਨੇਸ਼ ਰਾਠੌੜ, ਰੇਸ਼ਮ ਨੱਤ, ਡਾ: ਰਘਬੀਰ ਸਿੰਘ, ਡਾ: ਬਲਜਿੰਦਰ ਸਿੰਘ ਢਿੱਲੋਂ, ਪੱਲਵੀ, ਰਿਤਿਕਾ, ਗਗਨ ਭਾਟੀਆ, ਮਨੀਸ਼ਾ, ਰਿਤੂ, ਮੀਨੂ, ਡਾ: ਉਪਿੰਦਰ ਸਿੰਘ, ਸੁਸ਼ੀਲ ਸੂਦ ਆਦਿ ਹਾਜ਼ਰ ਸਨ।ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samaj
