ਦਿਵਾਲੀ

(ਸਮਾਜ ਵੀਕਲੀ)

ਸੁੱਖੋ ਗੱਲ ਕਰੇ ਪ੍ਰਸਿਨੀਂ ਨਾਲ਼,
ਕੀ ਦੱਸਾਂ ਬੇਬੇ ਘਰ ਦਾ ਹਾਲ।
ਘਰ ਨਾਂ ਆਟਾ ਨਾ ਕੋਈ ਦਾਲ,
ਅਸੀਂ ਤਾਂ ਸਾਰੀ ਉਮਰ ਟਪਾਲੀ,
ਸਾਡੀ ਕਾਹਦੀ ਦਿਵਾਲੀ ਬੇਬੇ ।
ਸਾਡੀ ਕਾਹਦੀ ਦਿਵਾਲੀ***।

ਬਾਪੂ ਦਾ ਕਰਜ਼ਾ ਲਾਹੁੰਦਾ ਹੈ ਪੁੱਤ,
ਹਾੜ ਸਿਆਲ਼ ਦੀ ਲੰਘੀ ਸਾਰੀ ਰੁੱਤ।
ਮੇਰੀ ਵੀ ਗੋਹੇ ਨਾਲ ਲਿਬੜੀ ਗੁੱਤ।
ਗਲ ਚ ਕਰਜੇ ਦੀ ਪੰਜਾਲੀ ਬੇਬੇ।
ਸਾਡੀ ਕਾਹਦੀ************।

ਵੱਡਾ ਮੁੰਡਾ ਨਿੱਤ ਲੇਬਰ ਚੌਂਕ ਚ ਜਾਵੇ,
ਖ਼ਾਲੀ ਖੀਸੇ ਬੱਸ ਘਰ ਨੂੰ ਮੁੜ ਆਵੇ
ਦਿਹਾੜੀ ਦੱਪਾ ਕੁਝ ਵੀ ਨਾ ਥਿਆਵੇ।
ਸਵੇਰ ਤੋਂ ਹੋ ਜਾਂਦੀ ਤਰਕਾਲੀਂ ਬੇਬੇ।
ਸਾਡੀ ਕਾਹਦੀ**************।

ਕੀ ਦੱਸਾਂ ਬੇਬੇ ਤੈਨੂੰ ਘਰ ਦਾ ਹਾਲ,
ਨੰਣਦ ਵੀ ਰਹਿੰਦੀ ਹੈ ਸਾਡੇ ਨਾਲ,
ਸਕੂਲੋਂ ਹਟਾ ਮੈਂ ਅਪਣਾ ਨਿੱਕਾ ਬਾਲ
ਲਾ ਦਿੱਤਾ ਵੱਡੇ ਘਰ ਚ ਪਾਲੀ ਬੇਬੇ।
ਸਾਡੀ ਕਾਹਦੀ****************।

ਸੱਸ ਮੇਰੀ ਬੜੀ ਬਿਮਾਰ ਹੈ ਰਹਿੰਦੀ
ਮੰਜੇ ਤੇ ਆਪੇ ਨਾਂ ਉੱਠਦੀ ਬਹਿੰਦੀ,
ਦਵਾਈ ਨਿਪੁੱਤੀ ਵੀ ਬੜੀ ਹੈ ਮਹਿੰਗੀ।
ਵਿਕ ਗਏ ਸਾਡੇ ਪਤੀਲਾ ਥਾਲੀ ਬੇਬੇ।
ਸਾਡੀ ਕਾਹਦੀ ****************।

ਕੀ ਦੱਸਾਂ ਬੇਬੇ ਮੈਂ ਕੁਦਰਤ ਦਾ ਭਾਣਾ,
ਛੋਟੀ ਬਹੂ ਕੋਲ ਹੈ ਨਿੱਕਾ ਨਿਆਣਾ,
ਘਰੇ ਨਹੀਂ ਖਾਂਣ ਨੂੰ ਇੱਕ ਵੀ ਦਾਣਾ
ਸਾਡੀ ਤਾਂ ਜਿੰਦ ਫਿਕਰਾਂ ਨੇ ਖਾਲੀ ਬੇਬੇ।
ਸਾਡੀ ਕਾਹਦੀ ****************।

ਕੋਠੇ ਜਿੱਡੀ ਹੋਈ ਧੀ ਮੁਟਿਆਰ,
ਉਸ ਦਾ ਵੀ ਸਾਡੇ ਸਿਰ ਤੇ ਭਾਰ।
ਮਿਲਦਾ ਨਾ ਕਿਤੋਂ ਕੋਈ ਉਧਾਰ।
ਦੇਵਾਂਗਾ ਕਿਵੇਂ ਭੰਮਾਲੀ ਬੇਬੇ।
ਸਾਡੀ ਕਾਹਦੀ *************** ।

“ਸੋਨੀ” ਸੱਚੋ ਸੱਚ ਹੈ ਲਿਖਦਾ ਰਹਿੰਦਾ,
ਗੱਲਾਂ ਬੜੀਆਂ ਹੀ ਖਰੀਆਂ ਕਹਿੰਦਾ।
ਕਿਰਤ ਕਰਿਆਂ ਵੀ ਨਾਂ ਪੂਰਾ ਪੈਂਦਾ।
ਨਾਂ ਹੋਈ ਕਦੇ ਜੂਨ ਸੁਖਾਲੀ ਬੇਬੇ।
ਸਾਡੀ ਕਾਹਦੀ ਦਿਵਾਲੀ ਬੇਬੇ।
ਸਾਡੀ ਕਾਹਦੀ ਦਿਵਾਲੀ ******।

ਜਸਵੀਰ ਸੋਨੀ
 94787-76938

‘ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly