ਆਓ, ਲੋੜਵੰਦ ਲੋਕਾਂ ਦੀਆਂ ਕੰਬਦੀਆਂ ਰਾਤਾਂ ਨੂੰ ਸੁਖਮਈ ਬਣਾਈਏ

(ਸਮਾਜ ਵੀਕਲੀ) ਜਦੋਂ ਹਵਾ ਵਿੱਚ ਠੰਡ ਮਹਿਸੂਸ ਹੁੰਦੀ ਹੈ, ਤਾਂ ਸਿਰਫ ਮੌਸਮ ਹੀ ਨਹੀਂ ਬਦਲਦਾ, ਕਈ ਲੋਕਾਂ ਲਈ ਜ਼ਿੰਦਗ਼ੀ ਦੀਆਂ ਚੁਣੌਤੀਆਂ ਵੀ ਵੱਧ ਜਾਂਦੀਆਂ ਹਨ। ਹਰੇਕ ਸਾਲ ਜਦੋਂ ਠੰਡ ਪੈਂਦੀ ਹੈ, ਤਾਂ ਕੁਝ ਲੋਕਾਂ ਲਈ ਇਹ ਸੁਹਾਵਣਾ ਮੌਸਮ ਬਣਦਾ ਹੈ ਅਤੇ ਕਈ ਲੋਕਾਂ ਲਈ ਇਹ ਜ਼ਿੰਦਗੀ ਦੀ ਲੜਾਈ ਬਣ ਜਾਂਦਾ ਹੈ। ਸੜਕਾਂ ਦੇ ਕਿਨਾਰੇ ਬੈਠੇ ਲੋੜਵੰਦ ਬੱਚੇ, ਬਜ਼ੁਰਗ ਅਤੇ ਗਰੀਬ ਪਰਿਵਾਰਾਂ ਨੂੰ ਇਸ ਕਹਿਰ ਨਾਲ ਲੜਨਾ ਪੈਂਦਾ ਹੈ। ਇਸ ਠੰਡ ਦੀਆਂ ਕੜਾਕੇਦਾਰ ਰਾਤਾਂ ਵਿਚ ਉਹਨਾਂ ਦੇ ਕੰਬਦੇ ਹੋਏ ਸ਼ਰੀਰ ਸਾਡੀ ਸਮਾਜਿਕ ਜ਼ਿੰਮੇਵਾਰੀ ਵੱਲ ਇਸ਼ਾਰਾ ਕਰਦੇ ਹਨ।

ਇਸ ਜ਼ਿੰਮੇਵਾਰੀ ਨੂੰ ਸਮਝਦਿਆਂ, ਅਸੀਂ ਸਾਰੇ ਮਿਲਕੇ ਇੱਕ ਛੋਟੀ ਜਿਹੀ ਕੋਸ਼ਿਸ਼ ਨਾਲ ਵੱਡਾ ਫਾਇਦਾ ਇਹਨਾਂ ਲੋਕਾਂ ਨੂੰ ਦੇ ਸਕਦੇ ਹਾਂ। ਜਦੋਂ ਵੀ ਤੁਸੀਂ ਆਪਣੀ ਕਾਰ ਜਾਂ ਹੋਰ ਗੱਡੀ ‘ਚ ਰਾਤ ਨੂੰ ਬਾਹਰ ਜਾਓ, ਤਾਂ ਆਪਣੇ ਪੁਰਾਣੇ ਗਰਮ ਕੱਪੜੇ, ਸਵੈਟਰ ਅਤੇ ਕੰਬਲ ਨਾਲ ਰੱਖੋ। ਇਹ ਸਧਾਰਨ ਜਹੀ ਕੋਸ਼ਿਸ਼ ਨਾ ਸਿਰਫ਼ ਗਰੀਬਾਂ ਲਈ ਮਦਦਗਾਰ ਸਾਬਤ ਹੋਵੇਗੀ, ਬਲਕਿ ਤੁਹਾਡੇ ਅੰਦਰ ਦਾਨ ਦੀ ਭਾਵਨਾ ਨੂੰ ਵੀ ਮਜ਼ਬੂਤ ਕਰੇਗੀ। ਉਹ ਬਜ਼ੁਰਗ, ਬੱਚੇ, ਜਿਨ੍ਹਾਂ ਦੇ ਸਿਰ ‘ਤੇ ਪੱਕੀ ਛੱਤ ਦੀ ਥਾਂ ਸਿਰਫ ਆਸਮਾਨ ਹੈ। ਉਹਨਾਂ ਲਈ ਸਾਡੇ ਬੈਡਾਂ ‘ਚ ਪਏ ਪੁਰਾਣੇ ਕੰਬਲ ਜਾਂ ਸਵੈਟਰ ਕਿਸੇ ਅਨਮੋਲ ਤੋਹਫ਼ੇ ਤੋਂ ਘੱਟ ਨਹੀਂ ਹੋਣਗੇ।

ਇਸ ਸ਼ੁਰੂਆਤ ਨੂੰ ਹੋਰ ਵੀ ਵੱਧ ਅਸਰਦਾਰ ਬਣਾਉਣ ਲਈ ਅਸੀਂ ਆਪਣੇ ਮਿਤਰਾਂ ਅਤੇ ਪਰਿਵਾਰ ਦੇ ਮੈਂਬਰਾਂ ਨੂੰ ਵੀ ਨਾਲ ਜੋੜ ਸਕਦੇ ਹਾਂ। ਸਮਾਜਿਕ ਮੀਡੀਆ ਪਲੇਟਫਾਰਮਾਂ ਜਾਂ ਆਪਣੀ ਕਮਿਊਨਿਟੀ ਵਿੱਚ ਛੋਟੇ-ਛੋਟੇ ਕੈਂਪ ਲਗਾਕੇ, ਅਸੀਂ ਲੋਕਾਂ ਨੂੰ ਇਸ ਪਹਿਲ ਦੀ ਮਹੱਤਤਾ ਬਾਰੇ ਜਾਣੂ ਕਰਵਾ ਸਕਦੇ ਹਾਂ। ਹਰ ਸਾਲ ਅਕਸਰ ਬੇਮਤਲਬ ਪੁਰਾਣੇ ਕੱਪੜੇ ਸਾਡੇ ਘਰਾਂ ‘ਚ ਪਏ ਰਹਿੰਦੇ ਹਨ, ਜਿੰਨ੍ਹਾਂ ਨੂੰ ਇੱਕ ਨਵੇਂ ਮਕਸਦ ਲਈ ਵਰਤਿਆ ਜਾ ਸਕਦਾ ਹੈ।

ਇਹ ਕੋਸ਼ਿਸ਼ ਸਿਰਫ਼ ਦਾਨ ਦੀ ਗੱਲ ਹੀ ਨਹੀਂ, ਇਕ ਮਨੁੱਖੀ ਫਰਜ਼ ਨਿਭਾਉਣ ਦੀ ਗੱਲ ਵੀ ਹੈ। ਜਦੋਂ ਤੁਸੀਂ ਕਿਸੇ ਗਰੀਬ ਨੂੰ ਕੰਬਦੇ ਵੇਖਦੇ ਹੋ ਅਤੇ ਉਸਨੂੰ ਇੱਕ ਕੰਬਲ ਜਾਂ ਸਵੈਟਰ ਦਿੰਦੇ ਹੋ, ਤਾਂ ਤੁਹਾਡੇ ਇਸ ਦਾਨ ਨਾਲ ਸਿਰਫ਼ ਉਸ ਦੀ ਜ਼ਿੰਦਗੀ ਸੁਰੱਖਿਅਤ ਨਹੀਂ ਹੁੰਦੀ, ਬਲਕਿ ਤੁਹਾਡਾ ਅੰਦਰੂਨੀ ਆਤਮ ਬੱਲ ਵੀ ਵੱਧਦਾ ਹੈ। ਅੱਜ ਦੇ ਮੋਡਰਨ ਯੁੱਗ ਵਿੱਚ ਜਦੋਂ ਵਿਅਕਤੀ ਸਿਰਫ਼ ਆਪਣੇ ਬਾਰੇ ਸੋਚਣ ਵਿੱਚ ਵਿਅਸਤ ਹੈ ਉੱਥੇ ਹੀ ਅਸੀਂ ਸਾਰੇ ਇਹ ਉਦਾਹਰਨ ਪੇਸ਼ ਕਰ ਸਕਦੇ ਹਾਂ ਕਿ ਮਾਨਵਤਾ ਅੱਜ ਵੀ ਜਿਉਂਦੀ ਹੈ।

ਆਓ, ਆਪਣੇ ਵਲੋਂ ਛੋਟੀ ਜਿਹੀ ਮਦਦ ਨੂੰ ਹੱਸਦੇ ਹੋਏ ਅੱਗੇ ਵਧਾਈਏ। ਸਾਡੇ ਇਸ ਛੋਟੇ ਜਿਹੇ ਯਤਨ ਨਾਲ, ਕੋਈ ਗਰੀਬ ਬੱਚਾ ਜਾਂ ਬਜ਼ੁਰਗ ਠੰਡ ਦੇ ਕਹਿਰ ਤੋਂ ਬਚ ਸਕਦਾ ਹੈ। ਮਾਨਵਤਾ ਦੀ ਇਸ ਮਿਸਾਲ ਨੂੰ ਅਮਲ ਵਿੱਚ ਲਿਆਉਣ ਲਈ ਆਪਣੀ ਜੀਵਨ ਯਾਤਰਾ ਦਾ ਇੱਕ ਮਹੱਤਵਪੂਰਨ ਹਿੱਸਾ ਬਣੀਏ।

ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly