(ਸਮਾਜ ਵੀਕਲੀ) ਮੈਂ ਆਪ ਲੰਮੇਂ ਸਮੇਂ ਤੋਂ ਪੰਜਾਬੀ ਕਵਿਤਾ ਦਾ ਵਿਦਿਆਰਥੀ ਹੋਣ ਦੇ ਨਾਤੇ ਨਵੇਂ ਪੁਰਾਣੇ ਕਾਵਿ ਸੰਗ੍ਰਹਿ ਪੜ੍ਹਨਾ ਮੇਰਾ ਮੁਢਲਾ ਸ਼ੌਕ ਹੈ । ਇਸੇ ਹੀ ਲੜੀ ਅਧੀਨ ਅੱਜ ਮੈਂ ਬਹੁਤ ਹੀ ਹੋਣਹਾਰ ਉੱਭਰਦੀ ਕਵਿੱਤਰੀ ਨਿਵੇਦਿਤਾ ਸ਼ਰਮਾ ਦੀ ” ਨਿਵੇਦਿਤਾ ” ਨਾਮੀਂ ਹੀ ਪੁਸਤਕ ਪੜ੍ਹ ਕੇ ਹਟਿਆ ਹਾਂ , ਜਿਸ ਵਿੱਚ ਛੋਟੀਆਂ ਵੱਡੀਆਂ ਬਹੁਤ ਹੀ ਪ੍ਰਭਾਵਸ਼ਾਲੀ ਅਤੇ ਮਹੱਤਵਪੂਰਨ ਪੰਜ ਦਰਜਨ ਦੇ ਕਰੀਬ ਕਵਿਤਾਵਾਂ ਸ਼ਾਮਿਲ ਹਨ । ਇਨ੍ਹਾਂ ਰਚਨਾਵਾਂ ਵਿਚਲੇ ਵੰਨ ਸੁਵੰਨੇ ਵਿਸ਼ੇ , ਕਲਾਤਮਿਕ ਪੱਖ ਅਤੇ ਮਨੁੱਖਤਾਵਾਦੀ ਵਿਚਾਰਧਾਰਾ ਪੜ੍ਹਨ , ਮਾਨਣ , ਵਿਚਾਰਨ ਅਤੇ ਸੰਭਾਲਣ ਯੋਗ ਹੈ । ਨਿਵੇਦਿਤਾ ਵੱਲੋਂ ਮਨੁੱਖੀ ਜੀਵਨ ਅਤੇ ਸਮਾਜ ਨਾਲ਼ ਜੁੜੇ ਲਗਭਗ ਹਰ ਵਿਸ਼ੇ ਨੂੰ ਕਲਾ ਦੀ ਚਾਸ਼ਣੀ ਵਿੱਚ ਡੋਬ ਕੇ ਸਾਰਥਿਕ ਸੇਧ ਦੇਣ ਦੀ ਸਫ਼ਲ ਕੋਸ਼ਿਸ਼ ਕੀਤੀ ਗਈ ਹੈ ।
ਭਾਵੇਂ ਉਸ ਦਾ ਇਹ ਪਹਿਲਾ ਉੱਦਮ ਹੈ ਪ੍ਰੰਤੂ ਲਿਖਤਾਂ ਕਿਸੇ ਪ੍ਰੌੜ ਸਾਹਿਤਕਾਰ ਦਾ ਭੁਲੇਖਾ ਪਾਉਂਦੀਆਂ ਹਨ । ਭਾਵੇਂ ਪੁਸਤਕ ਦੀਆਂ ਸਾਰੀਆਂ ਕਵਿਤਾਵਾਂ ਹੀ ਬਹੁਤ ਵਧੀਆ ਹਨ ਪ੍ਰੰਤੂ ਕੁੱਝ ਇੱਕ ਤਾਂ ਕਮਾਲ ਦੀਆਂ ਹਨ । ਪੇਸ਼ ਹਨ ” ਰੂਹ – ਫੰਬਾ ” ਨਾਮੀਂ ਲੰਬੀ ਕਵਿਤਾ ਦੀਆਂ ਕੁੱਝ ਮੁਢਲੀਆਂ ਅਤੇ ਅਖੀਰਲੀਆਂ ਸਤਰਾਂ ,
ਰੂਹ – ਫੰਬਾ ਚੁਗ ਸਾਹਾਂ ‘ਚੋਂ
ਚਾਨਣੀ ਵਿੱਚ ਡੁਬੋਵਾਂ ,
ਕਾਲ਼ੀ ਰਾਤ ਦੇ ਪੈਰਾਂ ਨੂੰ
ਮੈਂ ਪੋਲੇ – ਪੋਲੇ ਧੋਵਾਂ ।
****************
ਅੰਤਲੀਆਂ —
ਓਹਦੇ ਕਦਮਾਂ ਦੀ ਚਾਪ ਨਾ
ਦਿਲ ਦੀ ਧੜਕ ਮਿਲਾਵਾਂ ,
ਰਸਤਾ ਚੁੰਮਦੇ ਵੇਖਾਂ ਓਹਨੂੰ
ਖ਼ੁਦ ਰਸਤਾ ਹੋ ਜਾਵਾਂ!!
ਖ਼ੁਦ ਰਸਤਾ ਹੋ ਜਾਵਾਂ!!
******************
ਸੰਗਰੂਰ ਸ਼ਹਿਰ ਵਿੱਚ ਜੰਮੀਂ ਪਲ਼ੀ ਅਤੇ ਅੱਜ ਕੱਲ੍ਹ ਕੈਨੇਡਾ ਨਿਵਾਸੀ ਨਿਵੇਦਿਤਾ ਸ਼ਰਮਾ ਦਾ ਪਿਛੋਕੜ ਮੇਰੇ ਆਪਣੇ ਪਿੰਡ ਰਜਿੰਦਰਾ ਪੁਰੀ ( ਰੰਚਣਾਂ ) ਨਾਲ਼ ਸੰਬੰਧਿਤ ਹੈ । ਉਹ ਸਾਡੇ ਵੱਡੇ ਵੀਰ ਸਵਰਗੀ ਹਰੀ ਚੰਦ ਸ਼ਰਮਾ ਦੀ ਲਾਡਲੀ ਪੋਤਰੀ ਅਤੇ ਮੇਰੇ ਅਜ਼ੀਜ਼ ਸਤਵਿੰਦਰ ਕੁਮਾਰ ( ਛਿੰਦਾ ) ਦੀ ਸਪੁੱਤਰੀ ਹੈ ਇਸ ਲਈ ਇਹ ਮੇਰੇ ਹੀ ਨਹੀਂ ਸਾਡੇ ਸਾਰੇ ਪਿੰਡ ਨਿਵਾਸੀਆਂ ਲਈ ਮਾਣ ਦੀ ਗੱਲ ਹੈ ।
ਮੈਂ ਨਿਵੇਦਿਤਾ ਦੇ ਇਸ ਪਲੇਠੇ ਕਦਮ ਦਾ ਸੁਆਗਤ ਕਰਦਾ ਹੋਇਆ ਮੁਬਾਰਕਬਾਦ ਅਤੇ ਸ਼ੁਭ ਕਾਮਨਾਵਾਂ ਭੇਂਟ ਕਰਦਾ ਹਾਂ । ਪੰਜਾਬੀ ਸਾਹਿਤ ਜਗਤ ਅਤੇ ਸਾਹਿਤ ਪ੍ਰੇਮੀਆਂ ਨੂੰ ਉਸ ਤੋਂ ਹੋਰ ਵੀ ਚੰਗੀਆਂ ਰਚਨਾਵਾਂ ਅਤੇ ਪੁਸਤਕਾਂ ਪੇਸ਼ ਕਰਨ ਦੀ ਆਸ ਉਮੀਦ ਹੈ । ਆਮੀਨ ।
ਮੂਲ ਚੰਦ ਸ਼ਰਮਾ ਪ੍ਰਧਾਨ ,
ਪੰਜਾਬੀ ਸਾਹਿਤ ਸਭਾ ਧੂਰੀ ਜਿਲ੍ਹਾ ਸੰਗਰੂਰ ।
9914836037
