ਅੰਮ੍ਰਿਤਪਾਲ ਸਿੰਘ ਨੇ ਅਫ਼ਰੀਕਾ ਦੇ ਪਹਾੜ ਮਾਊਂਟ ਕਿਲੀਮੰਜਾਰੋ ਤੇ ਨਿਸ਼ਾਨ ਸਾਹਿਬ ਝੁਲਾਉਣ ਦਾ ਅਨੋਖਾ ਇਤਿਹਾਸ ਰਚਿਆ

(ਸਮਾਜ ਵੀਕਲੀ) ਬਲਦੇਵ ਸਿੰਘ ਬੇਦੀ :- ਅਫਰੀਕਾ ਦੇ ਸਭ ਤੋਂ ਉੱਚੇ ਪਹਾੜ ਮਾਊਂਟ ਕਿਲੀਮੰਜਾਰੋ (5895 ਮੀਟਰ) ਦੇ ਸਿਖਰ ‘ਤੇ ਨਿਸ਼ਾਨ ਸਾਹਿਬ ਲਹਿਰਾਉਣਾ ਹਰ ਸਿੱਖ ਲਈ ਮਾਣ ਅਤੇ ਸ਼ਰਧਾ ਦੀ ਗੱਲ ਹੈ। ਇਹ ਅਨੋਖੀ ਯਾਤਰਾ ਸਿੱਖ ਯਾਤਰੀ ਘੁੱਦਾ ਸਿੰਘ ( ਅੰਮ੍ਰਿਤਪਾਲ ਸਿੰਘ ) ਨੇ ਆਪਣੇ ਅਫਰੀਕਾ ਸਾਇਕਲ ਸਫ਼ਰ ਦੇ ਦੌਰਾਨ ਪੂਰੀ ਕੀਤੀ। ਅੰਮ੍ਰਿਤਪਾਲ ਸਿੰਘ ਨੇ ਆਪਣੇ ਅਫਰੀਕਾ ਸਫਰ ਦੌਰਾਨ ਤਿੰਨ ਮੁਲਕਾਂ ‘ਚ ਸਾਇਕਲ ਰਾਹੀਂ ਯਾਤਰਾ ਕੀਤੀ। ਦਮਦਮਾ ਸਾਹਿਬ ਤੋਂ ਨਿਸ਼ਾਨ ਸਾਹਿਬ ਆਪਣੇ ਨਾਲ ਲੈਕੇ ਚਲਣ ਵਾਲਾ ਇਹ ਯਾਤਰੀ ਮਾਊਂਟ ਕਿਲੀਮਾਂਜਾਰੋ ਦੇ ਪਹਾੜਾਂ ਵਿੱਚ ਪਹੁੰਚਿਆ। ਉੱਥੇ ਚੜ੍ਹਾਈ ਤੋਂ ਪਹਿਲਾਂ, ਉਸਨੇ ਤਿਆਰੀ ਨੂੰ ਪੂਰੀ ਗੰਭੀਰਤਾ ਨਾਲ ਲਿਆ। ਇਹ ਤਿਆਰੀ ਸਿਰਫ ਸਰੀਰਕ ਨਹੀਂ ਸੀ, ਸਗੋਂ ਮਨੋਵਿਗਿਆਨਿਕ ਅਤੇ ਆਤਮਿਕ ਪੱਧਰ ਤੇ ਵੀ ਬਹੁਤ ਮਜ਼ਬੂਤ ਸੀ। ਸਿਖਰ ਤੱਕ ਦੀ ਆਖ਼ਰੀ ਚੜ੍ਹਾਈ 4720 ਮੀਟਰ ਤੋਂ ਸ਼ੁਰੂ ਹੋਈ। ਰਾਤ 12 ਵਜੇ ਦੀ ਸ਼ੁਰੂਆਤ ਤੋਂ ਸਵੇਰੇ ਸਾਢੇ 8 ਵਜੇ ਇਹ ਸਿਖਰ ‘ਤੇ ਪਹੁੰਚਿਆ। ਇਹ ਰਾਹ ਵਧੇਰੇ ਔਖਾ ਸੀ, ਪਰ ਇਸਨੇ ਹੌਂਸਲੇ ਅਤੇ ਧੀਰਜ ਨਾਲ ਇਸਨੂੰ ਪੂਰਾ ਕੀਤਾ। ਸਿਖਰ ‘ਤੇ ਪਹੁੰਚਣ ਉੱਤੇ ਨਿਸ਼ਾਨ ਸਾਹਿਬ ਨੂੰ ਪੂਰੇ ਸਨਮਾਨ ਨਾਲ ਝੁਲਾਇਆ ਗਿਆ। ਇਹ ਪ੍ਰਾਪਤੀ ਸਿਰਫ ਸਿੱਖੀ ਦੇ ਪ੍ਰਤੀ ਸੱਚੀ ਸੇਵਾ ਹੀ ਨਹੀਂ, ਸਗੋਂ ਮਨੁੱਖੀ ਹੌਂਸਲੇ ਅਤੇ ਸਿਰਜਣਾਤਮਕ ਯਾਤਰਾਵਾਂ ਦੀ ਪ੍ਰੇਰਣਾ ਦਾ ਸਰੋਤ ਹੈ।  “ਪੰਥ ਤੇਰੇ ਦੀਆਂ ਗੂੰਜਾਂ ਜੁੱਗੋ ਜੁੱਗ ਪੈਂਦੀਆਂ ਰਹਿਣਗੀਆਂ” ਦੀ ਪ੍ਰੇਰਨਾ ਨਾਲ ਅੰਮ੍ਰਿਤਪਾਲ ਸਿੰਘ ਨੇ ਸੱਚਮੁੱਚ ਸਿੱਖੀ ਦੀ ਚੜ੍ਹਦੀ ਕਲਾ ਨੂੰ ਸਾਰੀ ਦੁਨੀਆ ‘ਚ ਲਹਿਰਾ ਦਿੱਤਾ । ਇਸ ਸਫ਼ਲਤਾ ਲਈ ਜਿੱਥੇ ਇਸਨੇ ਸੱਚੇ ਪਾਤਸ਼ਾਹ ਦੀਆਂ ਅਸੀਸਾਂ ਦਾ ਧੰਨਵਾਦ ਕੀਤਾ ਉੱਥੇ ਹੀ ਅਜਿਹੀਆਂ ਪ੍ਰਾਪਤੀਆਂ ਸਾਨੂੰ ਸਿੱਖ ਪੰਥ ਦੇ ਵਡੱਪਣ ਅਤੇ ਸਿਖਿਆਵਾਂ ਨੂੰ ਦੁਨੀਆ ਦੇ ਸਮੁੱਚੇ ਮੰਚ ‘ਤੇ ਲਿਜਾਣ ਦੀ ਪ੍ਰੇਰਨਾ ਵੀ ਦਿੰਦੀਆਂ ਹਨ।

ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly