(ਸਮਾਜ ਵੀਕਲੀ)
ਬਹੁਤਾ ਬੋਲੀਏ ਨਾ
——————-
ਜੇਕਰ ਜ਼ਿੰਦਗੀ ਮਾਨਣ ਦਾ ਚਾਅ ਹੋਵੇ ,
ਪੱਲੇ ਰੱਖ ਸੰਤੋਖ ਤੇ ਸਬਰ ਮੀਆਂ ।
ਸ਼ੌਂਕ ਸ਼ੌਕ ਵਿੱਚ ਨਸ਼ਿਆਂ ਦੇ ਲੜ ਲੱਗ ਕੇ ,
ਆਪੇ ਖੋਦੀਏ ਅਪਣੀ ਕਬਰ ਮੀਆਂ ।
ਤਾਕਤ ਬਖ਼ਸ਼ੀ ਜੇ ਹੋਵੇ ਪ੍ਰਮਾਤਮਾ ਨੇ ,
ਕਿਸੇ ਮਾੜੇ ‘ਤੇ ਕਰੀਏ ਨਾ ਜਬਰ ਮੀਆਂ ।
ਸੱਚ ਕਿਹਾ ਸਿਆਣਿਆਂ ਬੰਦਿਆਂ ਨੇ ,
ਬਹੁਤਾ ਬੋਲੀਏ ਨਾ ਚਬਰ ਚਬਰ ਮੀਆਂ ।
ਧੀ ਅੰਨ੍ਹੀਂ ਚੰਗੀ
—————–
ਚੰਗੇ ਦੁੱਧ ਦੀ ਪੈਦਾਵਾਰ ਖਾਤਰ ,
ਕਦੇ ਹਰਾ ਚੰਗਾ ਕਦੇ ਸੰਨ੍ਹੀਂ ਚੰਗੀ ।
ਭੈੜੀ ਸੰਗਤ ਤੋਂ ਬੰਦਾ ਇਕੱਲਾ ਚੰਗਾ ,
ਮਾੜੇ ਕੋਲ਼ੋਂ ਖਿਸਕਾਈ ਹੋਈ ਕੰਨੀਂ ਚੰਗੀ।
ਬੇਈਮਾਨੀ ਦੇ ਖੀਰ ਤੇ ਪੂੜਿਆਂ ਤੋਂ ,
ਰੋਟੀ ਹੱਕ ਹਲਾਲ ਦੀ ਖੰਨੀਂ ਚੰਗੀ ।
ਸੱਚ ਕਿਹਾ ਸਿਆਣਿਆਂ ਬੰਦਿਆਂ ਨੇ ,
ਜੱਭਲ਼ ਪੁੱਤ ਨਾਲ਼ੋਂ ਧੀ ਅੰਨ੍ਹੀਂ ਚੰਗੀ ।
ਮਾਂ ਦੇ ਚਰਨਾਂ ਵਿੱਚ
———————
ਜੀਹਨੇ ਨਹੀਂ ਕੀਤੀ ਕਰਕੇ ਵੇਖ ਸਕਦੈ ,
ਸੁੱਚੀ ਕਿਰਤ ਕਮਾਈ ਵਿੱਚ ਬਰਕਤ ਹੁੰਦੀ ।
ਜਿੱਤ ਓਸ ਦੇ ਪੈਰਾਂ ਨੂੰ ਆਣ ਚੁੰਮੇਂ ,
ਜੀਹਦੇ ਨਾਲ਼ ਜਹਾਨ ਦੀ ਖ਼ਲਕਤ ਹੁੰਦੀ ।
ਲੱਖ ਪੁੱਤ ਕਪੁੱਤ ਹੋ ਜਾਣ ਭਾਵੇਂ ,
ਮਾਂ ਦੀ ਪਾਕ-ਪਵਿੱਤਰ ਮੁਹੱਬਤ ਹੁੰਦੀ ।
ਸੱਚ ਕਿਹਾ ਸਿਆਣਿਆਂ ਬੰਦਿਆਂ ਨੇ ,
ਮਾਂ ਦੇ ਚਰਨਾਂ ਦੇ ਵਿੱਚ ਬਹਿਸ਼ਤ ਹੁੰਦੀ ।
( ਕਾਵਿ ਸੰਗ੍ਰਹਿ ” ਪੱਥਰ ‘ਤੇ ਲਕੀਰਾਂ ਵਿੱਚੋਂ )
ਮੂਲ ਚੰਦ ਸ਼ਰਮਾ ਪ੍ਰਧਾਨ ,
ਪੰਜਾਬੀ ਸਾਹਿਤ ਸਭਾ ਧੂਰੀ ਜਿਲ੍ਹਾ ਸੰਗਰੂਰ ।
9914836037
