(ਸਮਾਜ ਵੀਕਲੀ)
ਗ਼ਜ਼ਲ/ਮਲਕੀਤ ਮੀਤ
ਇਹ ਦੁਨੀਆਂ ‘ਤੇ ਦੁਨੀਆਦਾਰੀ ਦੋ ਮੂੰਹੀਂ !
ਇੱਕ ਦੋ ਨਹੀਂ ਸਾਰੀ ਦੀ ਸਾਰੀ ਦੋ ਮੂੰਹੀਂ !
ਹੱਸ-ਹੱਸ ਸਭ ਨਾਲ ਗੱਲਾਂ ਕਰਦੀ,
ਬੜੀ ਹੁਸੀਨ ਤੇ ਬਹੁਤ ਪਿਆਰੀ ਦੋ ਮੂੰਹੀਂ !
ਦਾਤਰੀ ਦੇ ਇਕ ਤੇ ਦੁਨੀਆ ਦੇ ਦੋ ਪਾਸੇ ਦੰਦੇ,
ਤਿੱਖੀ ਤੇਜ਼ ਕਟਾਰੀ ਆਰੀ ਦੋ ਮੂੰਹੀਂ !
ਤੇਰੇ ਅੱਗੇ ਤੇਰੀ ਆਂ ਬਸ ਤੇਰੀ ਆਂ ਮੈਂ ਤਾਂ,
ਮੂੰਹ ਤੇ ਸ਼ੀਰੀ ਪਿੱਠ ਪਿੱਛੇ ਖਾਰੀ ਦੋ ਮੂੰਹੀਂ !
ਸੁੱਖ ਮੌਕੇ ਨੇੜੇ ਤੇ ਦੁੱਖ ਵੇਲੇ ਕਿਉਂ ਦੂਰ ਦਿਸੇਂ,
ਕਿੱਥੋਂ ਸਿੱਖੀ ਇਹ ਅਦਾਕਾਰੀ ਦੋ ਮੂੰਹੀਂ !
ਗ਼ੈਰ ਜਿਹੇ ਬਣ ਕੇ ਸੀਨੇ ਯਾਰਾਂ ਸੱਟ ਮਾਰੀ,
ਅਜੋਕੇ ਯਾਰਾਂ ਦੀ ਵੀ ਯਾਰੀ ਦੋ ਮੂੰਹੀਂ !
“ਮੀਤ” ਤੂੰ ਇਸ ਦੁਨੀਆ ਦੇ ਕਾਬਿਲ ਜੇ ਹੋਣਾਂ,
ਸਿੱਖ ਲੈ ਤੂੰ ਵੀ ਕੋਈ ਹੁਸ਼ਿਆਰੀ ਦੋ ਮੂੰਹੀਂ !
