(ਸਮਾਜ ਵੀਕਲੀ)
ਤੁਰਿਆ ਹਾਂ ਮੰਜ਼ਲ ਦੇ ਰਾਹ ਤੇ ਚਾਵਾਂ ਨਾਲ ।
ਯਾਰੋ , ਮੈਂ ਕਿਉਂ ਲਾਵਾਂ ਯਾਰੀ ਛਾਵਾਂ ਨਾਲ ?
ਆਪਣੇ ਪੈਰਾਂ ਤੇ ਯਾਰੋ , ਮੈਨੂੰ ਹੈ ਮਾਣ ,
ਮੈਂ ਤੁਰ ਸਕਦਾ ਹਾਂ ਵਗਦੇ ਦਰਿਆਵਾਂ ਨਾਲ ।
ਲੱਖਾਂ ਸੱਟਾਂ ਖਾ ਕੇ ਮੈਂ ਬਣਿਆਂ ਚੱਟਾਨ ,
ਮੈਂ ਟੁੱਟ ਨਹੀਂ ਸਕਦਾ ਤੇਜ਼ ਹਵਾਵਾਂ ਨਾਲ ।
ਰੱਬ ਇਕ ਹੈ, ਉਸ ਦਾ ਹਰ ਇਕ ਵਿੱਚ ਵਸੇਰਾ ਹੈ ,
ਲੋਕ ਪੁਕਾਰਨ ਉਸ ਨੂੰ ਭਿੰਨ ਭਿੰਨ ਨਾਵਾਂ ਨਾਲ ।
ਆਂਡੇ ਪੀ ਜਾਵਣ ਉਹ ਮਿੰਟਾਂ ਵਿੱਚ ਜਿਨ੍ਹਾਂ ਦੇ ,
ਉਹ ਪੰਛੀ ਕਿੱਦਾਂ ਰਲ ਬੈਠਣ ਕਾਵਾਂ ਨਾਲ ?
ਕੌੜੇ ਬੋਲਾਂ ਦੇ ਫੱਟਾਂ ਦੀ ਪਿਆਰ ਦਵਾ ਹੈ ,
ਇਹ ਠੀਕ ਨਹੀਂ ਹੁੰਦੇ ਹੋਰ ਦਵਾਵਾਂ ਨਾਲ ।
ਉਸ ਵੱਲ ਗੈਰਾਂ ਨੇ ਅੱਖਾਂ ਚੁੱਕ ਕੇ ਕੀ ਤੱਕਣਾ ,
ਜੋ ਕਰਦਾ ਹੈ ਦਿਲ ਤੋਂ ਪਿਆਰ ਭਰਾਵਾਂ ਨਾਲ ।
ਪਹੁੰਚ ਗਿਆ ਹਾਂ ਮੈਂ ਆਖ਼ਰ ਮੰਜ਼ਲ ਤੇ ਯਾਰੋ ,
ਤੁਰਿਆ ਸਾਂ ਲੈ ਕੇ ਇਸ ਦਾ ਸਿਰਨਾਵਾਂ ਨਾਲ ।
ਮਹਿੰਦਰ ਸਿੰਘ ਮਾਨ
ਸਲੋਹ ਰੋਡ ਨੇੜੇ ਐਮ. ਐਲ. ਏ. ਰਿਹਾਇਸ਼
ਨਵਾਂ ਸ਼ਹਿਰ(9915803554)
‘ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly
