ਪੋਹ ਦਾ ਮਹੀਨਾ ਚੜ੍ਨ ਵਿੱਚ ਕੁੱਝ ਹੀ ਦਿਨ ਬਾਕੀ ਹਨ . ਸੰਘਣੀ ਧੁੰਦ ਪੈਣੀ ਸ਼ੁਰੂ ਹੋ ਗਈ ਹੈ . ਦਸ਼ਮੇਸ਼ ਪਿਤਾ ਦੇ ਵਾਰਸ ਦਿੱਲੀ ਦੀਆਂ ਬਰੂਹਾਂ ਉੱਤੇ ਬਹਿ ਕੇ ਚਮਕੌਰ ਦੀ ਗੜੀ੍ ਸਰਹੰਦ ਦੀ ਖ਼ੂਨੀ ਦੀਵਾਰ ਨੂੰ ਯਾਦ ਕਰਕੇ ਆਪਣੇ ਭਵਿੱਖ ਦੀ ਰੂਪ ਰੇਖਾ ਉਲੀਕ ਰਹੇ ਹਨ . ਭਾਈ ਮਤੀ ਦਾਸ ਸਤੀ ਦਾਸ , ਭਾਈ ਦਿਆਲਾ , ਪੰਡਤ ਕਿਰਪਾ ਰਾਮ , ਗਨੀ ਖਾਂ ਤੇ ਨਬੀ ਖਾਂ ਅਤੇ ਨਵਾਬ ਮਲੇਰਕੋਟਲਾ ਦੇ ਵਾਰਸ ਵੀ ਮੋਢੇ ਨਾਲ਼ ਮੋਢਾ ਜੋੜ ਕੇ ਬਰਾਬਰ ਖੜੇ੍ ਹਨ .
ਕਿਧਰੇ ਦੀਵਾਨ ਟੋਡਰ ਮੱਲ ਦੇ ਵਾਰਸ ਸ਼ਹੀਦ ਹੋਏ ਕਿਰਤੀ ਕਾਮਿਆਂ ਦੇ ਪਰਿਵਾਰਾਂ ਦੀ ਸਹਾਇਤਾ ਕਰਨ ਲਈ ਉਮਰ ਭਰ ਦੀਆਂ ਪੈਂਨਸ਼ਨਾਂ ਤੱਕ ਲਗਾ ਰਹੇ ਹਨ . ਸ਼ੀ੍ ਗੁਰੂ ਗੋਬਿੰਦ ਸਿੰਘ ਵੱਲੋਂ ਵਰੋਸਾਏ ਬਵੰਜਾ ਕਵੀਆਂ ਅਤੇ ਵਿਦਵਾਨਾਂ ਦੇ ਵਾਰਸਾਂ ਦੀਆਂ ਕਲਮਾਂ ਲਗਾਤਾਰ ਅੱਖਰਾਂ ਅਤੇ ਸ਼ਬਦਾਂ ਦਾ ਚਾਨਣ ਵੰਡ ਰਹੀਆਂ ਹਨ .
ਦੂਜੇ ਪਾਸੇ ਔਰੰਗਜੇਬ ਤੇ ਸੂਬਾ ਸਰਹੰਦ ਦੇ ਵਾਰਸ ਤਾਕਤ ਦੇ ਨਸ਼ੇ ਵਿੱਚ ਚੂਰ ਹੋ ਕੇ ਜਸ਼ਨ ਹੀ ਨਹੀਂ ਮਨਾ ਰਹੇ ਸਗੋਂ ਅੰਨਦਾਤਿਆਂ ਅਤੇ ਭਾਈ ਲਾਲੋ ਦੇ ਵਾਰਸਾਂ ਨੂੰ ਖੱਬੇ ਪੱਖੀ , ਅੱਤਵਾਦੀ , ਵੱਖਵਾਦੀ , ਖਾਲਸਤਾਨੀ , ਵਿਚੋਲੀਏ , ਦਲਾਲ , ਮਾਓਵਾਦੀ ਅਤੇ ਹੋਰ ਪਤਾ ਨਹੀਂ ਕੀ ਕੀ ਫਤਵੇ ਦੇ ਕੇ ਅਸਲੀਅਤ ਤੋਂ ਅੱਖਾਂ ਮੀਟ ਰਹੇ ਹਨ .
ਤੀਸਰੇ ਪਾਸੇ ਪਹਾੜੀ ਰਾਜਿਆਂ ਦੇ ਵਾਰਸ ਗਦਾਰੀਆਂ ਦੇ ਤਮਗੇ ਅਤੇ ਰਾਜੇ ਮਹਾਰਾਜਿਆਂ ਦੇ ਭੰਡਾਂ ਦੇ ਵਾਰਸ ਕੁੱਝ ਲਾਲਚੀ ਕੁੱਤੇ ਪੂੰਛਾਂ ਹਿਲਾਉਂਦੇ ਅਤੇ ਪੈਰਾਂ ਦੀਆਂ ਚੱਟਣ ਵਿੱਚ ਮਸ਼ਰੂਫ਼ ਹਨ .
ਪਰੰਤੂ ਇਸ ਦੇ ਬਾਵਜੂਦ ਇਹ ਗੱਲ ਵੀ ਪੱਥਰ ‘ਤੇ ਲਕੀਰ ਵਾਂਗੂ ਸੋਲ਼ਾਂ ਆਨੇ ਸੱਚ ਹੈ ਕਿ ਬਾਬਾ ਬੰਦਾ ਸਿੰਘ ਬਹਾਦਰ ਦੇ ਵਾਰਸ ਵੀ ਅਜੇ ਜਿਉਂਦੇ ਹਨ , ਸਦਾ ਜਿਉਂਦੇ ਹੀ ਨਹੀਂ ਰਹਿਣਗੇ ਸਗੋਂ ਹੋਰ ਵੀ ਪੈਦਾ ਹੁੰਦੇ ਰਹਿਣਗੇ ਅਤੇ ਗਾਉਂਦੇ ਰਹਿਣਗੇ ਕਿ
ਹਾਕਮ ਨੂੰ ਹੈ ਵਹਿਮ ,
ਕਿ ਲੋਕ ਨੇ ਫਟੇ ਹੋਏ ।
ਐਪਰ ਇਹ ਹਨ ,
ਰੱਸੀਆਂ ਵਾਂਗੂ ਵਟੇ ਹੋਏ।
ਇਹਨਾਂ ਕੋਲ਼ ਹੈ ਸਿੱਖਿਆ,
ਬਾਬੇ ਨਾਨਕ ਦੀ ;
ਇਹ ਆਪੋ ਅਪਣੇ ,
ਮੋਰਚਿਆਂ ‘ਤੇ ਡਟੇ ਹੋਏ।
ਮੂਲ ਚੰਦ ਸ਼ਰਮਾ ਪ੍ਰਧਾਨ
ਪੰਜਾਬੀ ਸਾਹਿਤ ਸਭਾ ਧੂਰੀ ( ਪੰਜਾਬ )
9478408898
